حسين.. أصغر "رابر" مصري
لو سمعت عن مطرب مصري اسمه MC YU-GI-OH
يبقى المقصود هو الطفل "حسين علي" أصغر مطرب راب في مصر!.
"الرابر" حسين في سنة رابعة ابتدائي، وبعد أن كان يغنى فقط بالمنزل أصبح مكانه المسرح، وتنهال العروض عليه من كل مكان للمشاركة في تقديم فقرات خاصة بفن الراب..
حسين.. إزاي حبيت فن الراب؟
أنا مكنتش أعرف أني بحب الراب ولا حاجة، ولا كنت فاهم أن عندي موهبة غناء الراب والرقص على أغانيه، كل الحكاية أن أخويا الكبير كان بيستضيف أصدقائه في منزلنا وكانوا دايما بيأدوا رقصات على فن الراب.. وتفاجئ أخويا أني أردد الأغنيات وأحفظها بسرعة أوي.
فاكر أول مرة صعدت فيها لخشبة المسرح؟
طبعا فاكراها كانت في ساقية الصاوي، كنت مرعوب وخايف ومكسوف، لكن بمجرد أن غنيت والناس عجبها صوتي وأدائي وصقفوا لي بدأت أطمئن شوية وغنيت بقلب جامد، ومن وقتها وعروض كتير استقبلتها لكن أكتر مرة حسيت فيها أن الناس بتحبني بجد يوم صعدت لخشبة المسرح مع الفنان أحمد الفيشاوي، وكان معانا نجوم راب من السعودية ولبنان بجد المرة دي عمري ما أقدر أنساها أبدا.
وإيه حكاية لقب MC YU-GI-OH؟
أنا اللي اخترت هذا اللقب لنفسي لأني بحب الفراعنة أوى وخاصة الناس اللي كانوا ليهم دور مهم، والرمز ده اختارته بصفة خاصة نسبة إلى فرعون مصري حاول أن يحرر العالم.
حسين.. أنت زعلت على مايكل جاكسون لما مات؟
طبعا أنا كنت أعتبره مثل أعلى لي تعلمت من حركاته حاجات كتير أوى، بس يا خسارة مات ربنا يرحمه.
وأكتر الأغاني اللي بتحبها له كانت إيه؟
أكتر أغنيه كانتblack &white وأغنيه أخرى اسمهاdon’t walk away والكثير من الأغنيات الأخرى التي احتفظ بها في مكتبتي.
ومين تاني من مطربين الراب بتحبهم؟
طبعا "ايمينيم" لأنه مميز جدا في كل شيء كلمات أغنياته وأدائه وتعبيرات وجهه نفسها جميلة ومعبرة عن كل كلمه بيقولها ويغنيها، وكمان أغانيه لها هدف مش رقص وتنطيط وخلاص عشان كده هو ناجح أوي وأنا بحترمه.
وأنت أغانيك ليها هدف؟
فيه مشاكل كتير أوى في مصر والدول العربية والحكام مش عارفين يحلوها للأسف وبيخافوا حتى أنهم يطرحوها، عشان كده أنا بناقشها في أغنياتي وباللغة العربية.
وإيه اكتر المشاكل اللي ناقشتها؟
البطالة والناس اللي بتتخرج ومش لاقيه شغل ليها وبيقعدوا على القهاوي، وبرضو القضية الفلسطينية وقضية العراق وغيرها من القضايا اللي بتوجع القلب.
شايف أن مجال الراب له تشجيع في مصر؟
مش أوى، لكن أنا شايف إنه إن شاء الله في السنين اللي جاية هيكون فيه انتشار للفن ده، وعلى فكرة شباب كتير أوى بيحبوا الراب وبيحبوا دايما يسمعوا لجاكسون وبريسلي وسبيناترا وغيرهم.
ممكن تغني لون تانى غير الراب؟
أنا شايف نفسي في الراب اكتر رغم أني ممكن أسمع كل حاجة، لكن أنا مش بحب أشتت نفسي، ولما عرفت أنى بغني راب كويس فأنا حابب أنى أركز فيه أحسن بكتير من أني أغني في حاجات كتير وأفشل فيهم.. فأنا لا أحب الفشل على الإطلاق ولا أتنازل عن لقب الأول في أي شيء في حياتي.
يعني موهبتك لم تؤثر على دراستك؟
بالعكس دي أعطتني دافع اكتر أني أذاكر عشان أنجح وأخلص دراستي، علشان أتفرغ لفن الراب لأنه حياتي ونفسي أبقى "رابر" عالمي.