صعبان علي عشماوي
بصراحة أنا صعبان عليّ قوي عمي عشماوي السنة دي مش هيلاحق من أحكام الاعدام اللي نازلة ترف عليه. ولو كنت مكانه لازم أطالب بعلاوة استثنائية وكمان كادر خاص!! فلأول مرة يواجه عمنا عشماوي ـ ربنا يديله الصحة والعافية ـ أحكاما بالاعدام تعدت السنة دي ٠٤ حكم اعدام.
يا تري إيه مشاعر عمنا عشماوي.. هل يكون سعيدا وهو يسمع كل يوم عن احالة بعض المتهمين لفضيلة المفتي؟ أم يشعر بأن هناك مزيدا من الأعباء سوف تلقي عليه؟!
المهم ربنا يديله الصحة والعافية ويؤدي مهمته علي خير وجه، لكن حكاية كثرة أحكام الاعدام دي ستضعنا في مشكلة وبصراحة عايز أسمع فيها رأي رجال العدالة. ففي القضية التي حكم فيها علي ٤٢ متهما بالاعدام ،هل يمكن أن ينفذ الحكم في يوم واحد!! أعتقد المهمة ستكون صعبة شويتين علي عمنا عشماوي ولازم وزارة الداخلية تشوف لها مخرج.
طيب لو افترضنا ان الحكم هيكون بالتقسيط يعني كل يوم يعدم ٣ أو ٤ أليس ذلك خللا بالعدالة ان يموت متهم قبل الآخر؟
أي لا توجد مساواة في اللحاق بعزرائيل وأخشي ما أخشاه ان يخرج علينا جهبذ من المفتجية ويقول ان ده غير دستوري.. الحكم بإعدام المتهمين صدر في جلسة واحدة يبقي الاعدام لازم يكون مرة واحدة.. وهنا تكمن مشكلة عمي عشماوي.
وفي حالة اعدام متهم وزوجته هل نعدم الراجل الأول ولا نعدم الست؟! أنا في رأيي نعدم الست الأول تأكيدا للمساواة.
عموما والله العظيم أنا قلبي بيتقطع من حكاية كثرة أحكام الاعدام.. الاعدام لم يعد للأسف الشديد رادعا يخافه الناس.. أسهل حاجة دلوقتي القتل .. واد يموت أمه وست تقطع جوزها .. العملية بقت سايبة وعايزة واقفة جامدة لأن انهيار القيم الأخلاقية أخطر شيء يمكن يصيب الناس.