أنا vs. المدير
المثل بيقول
لاقيني ولا تغديني
من ساعة ما جيت السويد واشتغلت في الفندق وانا مبسوطه جدا .. لاني باشتغل في المجال اللي بعشقه من صغري عشان كده كنت بتغاضي عن اي ديفوهات متوقعه
زي احساسي بالغربه ( اللي عوضه كتير وجود اصدقاء المدرسه السويديين ومنه صاحبتي ) بس مشكله ان لما منه تسافر .. اعد انا آكل في نفسي عايزه حد يتكلم معايا عربي
عربي يا اخوانا
مافيش
المهم
من ساعة ما جيت واتعرفت علي الناس بتوع الشغل وانا فرحت جدا لان بصراحه الناس كويسه
اما المدير فكان كلامه بحذر معايا
وواحده واحده بدأ ياخد عليا وأخد عليه والحياه بقت موز باللبن، لكن علي فترات بدات احس انه بيستعبط
يبقي ماشي جمبي مثلا يخبط فيا .. ايده تروح ما ترجعش
يعد بالساعه يتكلم معايا ويسيب الشغل
لحد ما عرفت انه متجوز .. قولت اكيد الراجل مدام متجوز يبقي مش قصده " وان بعض الظن إثم"
مراته
احلي ست سويديه شوفتها لحد دلوقت من حيث الشكل حاجه كده تضرب جوليا روبرتز بالجزمه
موزه موزه يعني
يعني المفروض اللي يتجوز الست دي ما يبصش لا مؤاخذه لواحده زيي
" انا بس اللي اقول كده "
المهم
الموضوع تعدي كونه بيخبط فيا
يعني ماهو انت لما تخبط في واحده هاتخبط اخرك في كتفها الخبطه مدتها ثانيه مش يعني هتيجي تلزق وتقولي مش قصدي
لحد ما في ليله " اكتمل فيها القمر " جالي بسلامته وعرض عليا
عرض عليا ايه يا حلوين
قاللي اسما ( ما بيقولوش الهمزه هو ده اخرهم ) انتي بنت جميله
الله يحفظك يا روح امك كلك ذوق ( انا بكلمهم كده فعلا علي فكره بس بالعربي لما اتخنق من حد فيهم )
- انا عارف ان في مصر انتوا مش بتاخدوا حريتكم في الجنس
= ازاي يعني مش فاهمه
- يعني انتوا محجمين نفسكم
( هييييه خلاص يا اخواننا بعد كده كل واحد ياخد مراته وينزل علي ميدان التحرير )
= يعني ايه محجمين نفسكم
- يعني الجنس متحفظين عليه اوي زياده عن اللزوم . الجنس امتع حاجه في الوجود ومش بتتعلموه حتي
علي راي عادل امام " مانا ابويا وامي ماكانوش يعرفوا حاجه عن الجنس وجابوني ولا هو يعني السكس ده نزل اول امبارح باليل "
= المهم يا عم الكوتوموتو عاوز توصل لايه
- بصي يا اسماء . انا ومونيكا بنحب نجرب حاجات في الجنس . ايه رايك لو تشاركينا
= نعم؟
- يعني تيجي تقضي الليل معانا انا وهي
اوبااااا ... الواد ده غوط اوي
= افندم؟
- قصدي انك تيجي تنامي معانا
= نعم يا عوومااااار ( في سري ) بكل هدوء: بص يا كابتن انا مش جايه هنا عشان انام مع حد انا جايه هنا اشتغل وبس
- اسما مش عايزك تاخدي موقف من كلامي احنا هنا في السويد والسويد بلد حر
حر . ال حر ال طب وانا مال امي ويعني اشمعنا انت في السويد كلها اللي عايز تنام معايا وباقية الناس بعقلها , اما راجل مش ولا بد صحيح
= انا ارفض جدا . وماسمحلكش تكلمني بالطريقه دي تاني فاهم
- آسف
= لا محترم يا واد
المهم عديت الموضوع وقلت يا بت يمكن الراجل تعبان ولا حاجه اكنه ماتكلمش معاكي اصلا
فاتت فتره وفاتت دقايق وفاتت وراها دقايق تضايق، لحد ما في يوم قعدت علي مكتب المدير بخلص شغل من عليه عشان هو مش موجد اذ فجأة الاقي فولدر مكتوب عليه اسمي، قلت اشوف، وياريتني ما شوفت
لقيت كل صوري بلا استثناء منقوله من جهازي .. طب ازاي امتي ليه وفين ومين وبكام .. ماعرفش؟
طبعا اشتكيت المدير للمدير الاعلي منه وده بقي راجل عنده ستين سنه وقعد 10 سنين في مصر وبيحبني جدا
راح عامل عليه هقوله وقاله احترم نفسك ومالكش دعوه بيها والكلام الحمصي ده
وبارضه عديت الموضوع وفي ليله من ذات الليالي كنت انا وهو لوحدينا في المكتب
أن أنآ آآآآآن تش
والمطره بتمطر والقهوه بتغلي وعمال يبص اودي وشي الناحيه التانيه وارجع الاقيه بيبص
والامر اتطور انه قام
واحنا قاعدين
وقام قالع الجاكت
واحنا قاعدين
وقرب عالمكتب
فانا قومت بقي
= عاوز حاجه؟
- اه
= اؤمر . تي شيرت ولا بنطلون؟
- انا بكرر طلبي تاني
= لو قربت مني . هاصوت وهلم عليك اللي يسوي واللي مايسواش
- ماهو انا لازم اقرب
وهوووووووووب
كلته بالقلم
ده بيقترب .. بيقترب بيقترب
قومت ضرباه برجلي في مكان كان هيحتاجه اوي لو كنت وافقت وجريت علي الباب وندهت الامن
وروحت علي قسم البوليس . وكشفت راسي واتجهت . وقلتله يا حضرة الصول الراجل ده بيتحرش بيا
قام واقف حضرة الصول . ( حاجه فضلة خيركوا كده موز بارضه )
وقاللي قدمي شكوي
قدمت وفعلا رفعت عليه قضية تحرش والعيال اللي عندنا في الشغل شهدوا معايا لانهم لاحظوا كذا مره انه بيستعبط
وسافرت علي فنلندا اجازة 4 ايام لحد ما الموضوع خلص ورجعت علي اخر يوم وشهادتي للقضيه
والنتيجه
اولا : المدير اتنقل من الفندق وراح مكان اداري كده مش في ستوكهولم اصلا
ثانيا : عمل تعهد انه مايلمسنيش تاني طول حياته ولو لمسني هياخد 5 سنين
ثالثا : كان فيه ظابط امور كده اداني الكارت بتاعه وقالي اي حد يتعرضلك كلميني انا عادي كلمته تاني يوم ( اوعي الصياعه )
رابعا : بعتولي اعتذار وقالولي ان الشعب السويدي محترم واحنا آسفين ونوعدك ان ده مش هيتكرر تاني وكمان عملولي حفله في الشغل
وتوته توته فرغت الحدوته
الجميل في الموضوع اني ماشوفتش المدير من يوم المكتب والحمد لله مش عاوزه اشوفه وانا كنت السبب ان زميلتي تاخد مكانه في الترقيه وتبقي هي المديره عشان كده انا عندها بقيت اهم من جوزها وبقت الحياه اشطه
واحب اطمنكم اخواني واخواتي اني رفعت راسكم وراس مصر وبقت علاقتي مع الناس زي السكينه في الحلاوه
واهديلكم اغنية
والله وعملوها الرجاله ورافعوا راس مصر بلدنا