الحكومة المصرية والخنازير إيه إللى بيعملوه ده ؟؟؟

حاسب يا معلم الموضوع كبير كبير كبير , كبير قوى كمان

عن انفلونزا الخنازير وتعامل الخنازير معاها (( أسف قصدى الحكومة )) من المرات القليلة جدا إللى ممكن أتفق مع خطة الحكومة فى معالجة مشكلة ما , كانت فى موضوع أنفلونزا الخنازير (( مش أتفاق كامل برضو )) وهذا الوباء الذى يشتد يوما بعد يوم إلى أن قاربت منظمة الصحة العالمية من إعلانه وباءا عالميا ويعتقد أنه سيشكل اخطر وباء يواجه سكان الأرض … يا نهار خنازير ,,

مع انتشار الوباء ده حاولت الحكومة المصرية وكالعادة بالأصرار على أن مصر بلد الأمن والأمان ومش بيهزها أى حاجة وأن الخطر بعيد جدا عن مصر ده حتى ما دخل الشقيقة الإسرائيلية (( أخت حكومتنا يعنى )) برضو ظلت الحكومة الخنزيرية بتاعتنا وبكل أجهزتها حتى الرياضية منها و المالية كمان تؤكد وتصر وتشجب وتدين المرض وأنه بعيد عن انف أى مصرى رغم انف أى خنزير

حاولت الحكومة والحزب الوطنى الهروب من شبح أنفلونزا الطيور وفشلها الذريع فى حل أزمتها الماضية (( على فكره رجعت تتجدد تانى ومصر رابع دولة فى تصنيف الدول المعرضة لإنتقال السارس من إنسان لإنسان )) فكروا فى حل جذرى يريحهم من الموضوع كولاته وبلاها وجع دماغ بقى قالك إيه أعدم الخنازير يا معلم وأنا متفق مع الأعدام بس بشروط يا معلم ليه بقى الإعدام ده مفيد جدا حيخلصنا من أساس المشكلة لأنه الوباء ده مش قليل ولابد من قطه أساسه من البداية وأنا طبعا مش بقول كده من أى نظرة دينية عشان محدش مريض يقول أن كلامى ده لأن دينا ينهانا عن لحوم الخنازير .

بس تعالوا نناقش قرار الحكومة ومجلس الشعب

طلع القرار بالإعدام وده أصلا لم يتم تنفيذه لأنه تم ذبح الخنازير , كمان التعويضات التى تم صرفها للأهالى سخيفة جدا جدا جدا 350 جنيه للعشر من الخنيزيرات ( الحامل يعنى ) و 100 جنيه للعادى و 50 للصغيرة والأسعار دى ماتجيش أى حاجه ولو فى مصاريف تربية الحيوانات دى ,, تالت حاجة تعامل الحكومة مع الأهالى بطريقتها الوقحه دوما و أستخدام القوة، لحد امتى بقى

أخر حاجة .. طب أعدمتوا أو ذبحتوا الخنازير طيب وعشش ومخلفات وزرايب ( أسف فى الكلمة ) تربية الخنازير دى ماشفناش أى تعامل معاها مع انها أشد خطر من الخنازير نفسها فى نقل المرض ملحوظة بس جميع مزارع الخنازير فى مصر عبارة عن زرايب ( فوق قلت أسف ) ومافيش أى أماكن تربية صالحه او نضيفه .

أنا عن نفسى موافق جدا على قرار الإعدام ده ومعاه إعدام أماكن تربية هذه الحيوانات بشرط تعويش الأهالى التعويض الكامل والمغرى قبل كل شئ وياريت محدش يقول أن الإعدام ده غير أنساسى كانت فين الأنسانية دى مثلا لما أعدمت بريطانيا ملايين رؤوس الأبقار لما أنتشرت الحمى القلاعية للبقر وجنون البقر مع أن أضراره ماتيجيش حاجة فى أضرار أنفلونزا الخنازير

أنت إيه رائيك :-

كيف ترى تعامل الحكومة المصرية مع أزمة أنفلونزا الخنازير

راضى عن أداء الحكومة

راضى إلى حد ما

غير راضى بالمرة عما فعلته