بيض وتونة.. ومذيعة تخينة.. وبالعبري!
بعد يوم عمل طويل وسخيف، رجعت البيت واقع من الجوع. أمي قالت لي "أغرف لك؟" .. تهللت أساريري؛ لإني فهمت إن النهاردة فيه طبيخ. حاكم أنا أمي لما تكون طابخة تقول لي "أغرف لك؟" ، أما لو كان الأكل بيض وتونة تقول لي "تاكل؟" .. عموما لا مشاحة في الاصطلاح. ( حلوة مشاحة دي؟)
اتحط الأكل قدامي وقبل حتى ما أبص عليه قلت أتسلى وأفتح التلفزيون .. وبدأت أمارس العادة السيئة بتاعتي . حاكم أنا –بعيد عنك- إيدي ما تطولش الريموت إلا ولازم استعرض القنوات كلها ورا بعض كل 3 دقايق ، في عرض بانورامي ، وطبعا ده بيوتر اللي قاعد جنبي.. القصد عادة ونبطلها.
بدأت بالقناة الأولى فلقيت فيديو كليب لأحد الأغاني الحديثة. طبعا مش فاكر لا كلمات الأغنية ولا لحنها، لإن الأغنية ببساطة كانت عبارة عن كاميرا متثبتة على جزء معين عمال يتهز اهتزازات منتظمة.
استعذت بالله من الشيطان الرجيم، وحولّت على القناة التانية، لقيت إعلان عن تصفيات "ستار ميكر.. سمعنا صوتك" . ومحدش يسألني عن المغص اللي حسيت بيه ساعتها لإني مش فاكر تحديدا هو كان بسبب الأصوات المشحّطة وألا بسبب الأشكال الغريبة اللي توجع البطن. كل اللي فاكره إني حسيت ساعتها إنهم مفروض يعملوا جايزة قريّب لأحسن "سميّع" حيث إن الناس كلها بقت بتغني اليومين دول، وساعتها اقترح يخللوا شعار البرنامج "سمعنا سكاتك ".
نقلت على القناة التالتة لقيت إعلان طويييييييييييييييييييييييل عن منتج حريمي، كنت باسمع من أمي إن البنات كانت بتتكسف تسأل عليه البنت اللي واقفة في الصيدلية.
بحركة عصبية حوّلت على القناة الرابعة لقيت برنامج رياضي بيناقش بعصبية شديدة المؤامرة اللي تعرضت ليها مصر وضيعت عليها تنظيم المونديال 2010 بعد ما كانت اللجنة مقتنعة جدا وناقص تبوس إيدينا عشان نوافق ننظمه.
سيبت الناقد الرياضي ينخع وطلعت على القناة الخامسة لقيت نشرة الأخبار، حسيت إني ممكن اتفرج هنا ولو خمس دقايق، لكني عدلت عن تفكيري الشرير لما لقيت السيد عمرو موسى بيطالب بعدم التقليل من دور الجامعة العربية خاصة بعد القمة العربية المبروكة.
على القناة السادسة استقبلني مسلسل عربي... يااااااااااااه من زمان ما تابعتش مسلسلات. بس بصراحة طلعت إنسان حاقد لإني ما قدرتش استحمل الكلام عن الملايين اللي مع كل أبطال المسلسل، وجت لهم عقدة نفسية عشان مش عارفين يصرفوها إزاي . قريت الفاتحة لعم سيد اللي مات في خناقة قدام فرن في الكوم الاخضر، ونقلت على القناة السابعة .. وألقى في وشي يا مؤمن مذيعة لا تقل بأمانة شديدة عن 120 كيلو ، بتقدم برنامج منوعات وعايشة في دور مذيعات لبنان. ( الغربية إني قريت من فترة في الجرايد أنه لا مكان للبدينات في ماسبيرو ).
القصد.. سيبت الأخت "رزان" بتشكر جمهور برنامجها اللي بيمدح في تسريحة شعرها والجاز اللي في شعرها، وحوّلت على القناة التامنة .. لقيت برنامج اسمه" سامر الجنوب" .. حسيت إن النهضة الإعلامية الراشدة في عصر السماوات المفتوحة لسه ما وصلتش لإخواننا الطيبين دول، بس ح يروحووا فيييييين؟؟!
على قناة NILE TV من حظ أهلي لقيت فترة البث الموجّه باللغة العبرية. المهم لقيتهم جايبين أغنية لمحمد محيي ومترجمينها بالعبري،بصراحة ساعتها بس فهمت معنى "الحرب الباردة".
حوّلت على قناة النيل للأخبار لقيت مناظر دمار بشعة. صراحة ما قدرتش أميّز قبل ما أعلّي الصوت هي في فلسطين وألا في العراق!!!
الغريبة إني لما عليت الصوت لقيت السلطة الفلسطينية بتطالب المجتمع الدولي بالتدخل لإنعاش عملية السلام!
أما الزغلول الكبير بقى فكانت قناة النيل للمنوعات، البرنامج بتقدمه 3 مذيعات مع بعض (البركة في اللمة) وقاعدين على الأنتريه مستفردين بالمطرب الشاب ( والله ما بقيت أعرفهم من بعض ) بيناقشوا عقبال عندك كده مشواره وعطاؤه الفني، ومشكلة الدخلاء على الفن، وانحطاط الذوق العام.
لحد كده ومفيش مشكلة، إنما الخنقة بقى لما يقعدوا يتحايلوا علي أهله عشان يقوم يسمعهم حاجة، وهو بيعتذر عشان شعر مناخيره بينقح عليه، وبعد إلحاح شديد يقوم "القمّور" ويحرك شفايفه مع "البلاي باك" ( هبل إحنا بقى!!!)
صراحة حاجات كتيرة ما فهمتهاش في البرنامج زي إصرار المخرج إن الكاميرا تكون عند رُكب المذيعة، أو السر في كسوف المذيعة لما واحد يتصل يمدح تسريحة شعرها رغم إن الموقف ده بيتكرر كل يوم، ويمكن اللي ما يقولش كده يقطعوا عليه الخط.
طفيت التلفزيون، ورميت الريموت على جنب، وقلت آكل بدل ما آكل في نفسي. بصيت للأكل: لقيته "بيض وتونة"!!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
حلو أوي يا أحمد ..
أدينا أكتر
ده اللي اسمه الفضا
أعجبتني بعض الأجزاء كثيرا وفجرت ضحكي أكثر من غيرها..
- وصفك لأغنية الفيديو كليب..
- الجرأة والتهذيب في نفس الوقت في الإشارة إلى الإعلان الطويييييل.
- كان موفقا جدا تعليقك بهذه الجملة "بصراحة ساعتها بس فهمت معنى "الحرب الباردة"." على ما تعرضه الـ Nile TV من الفقرة العبرية المستفزة.
- الختام بدءا من جملة "صراحة حاجات كتيرة ما فهمتهاش ..."
في النهاية أحييك على المقال وأنتظر القادم ..
أجنادين
26/5/2004
إلي الأمام يا عشرينات..
...إمضاء: شرطي مرور