نيو لوك الشرق الأوسط
باختصار دماغنا صدعت بأه..هي أمريكا ما ورهاش حاجة غيرنا.. إيه يا عم بوش .. ما عندكش أخوات ولاد .. أو حتى بنات ؟!.. شوية "شرق أوسطية".. وشوية "مبادرة كولن باول للديمقراطية والمهلبية" ..والجديد "الشرق الأوسط الكبير" ..إيه يا عم .. هو إحنا فيران تجارب؟!
نقول القصة م الأول:
مؤخراً خرجت علينا الإدارة الأمريكية بمبادرة الشرق الأوسط "الكبير"، مؤكدين أن دول العالم الإسلامي سوف تصير أكثر تقدما وتحضراً وحلاوة و" كلبظة" في حالة تبنيها الفكرة!
وفكرة "الشرق الأوسط الكبير" أعلنتها الإدارة الأمريكية لأول مرة في تصريح رسمي يوم 9 فبراير 2004، وقد طرحها بوش على رئيس وزراء تركيا في الشهر نفسه تميهداً لأن تصبح تركيا هي معلم الحتة.
هدف المبادرة المعلن أن يصبح العالم الإسلامي أكثر ديمقراطية، تشيع فيه حرية المرأة والشواذ والتجارة، ويشير مصطلح "الشرق الأوسط الكبير" إلى بلدان العالم العربي، زائداً عليها باكستان وأفغانستان وإيران وتركيا و... إسرائيل.."فهمت يا حدق" ..!
ليه بيداري كده ولا هو داري كده ..
أما هدفها الخفي هو تحقيق سيطرة أكبر وأوسع على مقدرات العالم الإسلامي، ويتحقق ذلك بقيادة تركيا "كده وكده" على المنطقة، بينما سترتع فيه إسرائيل وتصبح هي الآمر الناهي.
عمو صدام عايز يشوفكم !
فرد بعض الزعماء العرب على أمريكا برفض المبادرة لأنها مفروضة عليهم من الخارج ، ولأنهم يعلمون أن المبادرة ستعود عليهم بكل شر، فهم إما يركعوا لبوش أكثر وأكثر، وإما .. "كارت أحمر" يا كباتن..ما نعطلكوش يا حلوين..عمو صدام ف الحفرة عايز يشوفكم!
إلا أن الزعماء العرب لم يكونوا الوحدين ضد هذا القرار، ففرنسا وإيطاليا وروسيا رفضت المبادرة، لأن السبوبة فلوسها مش حاضرة..وأمريكا م الآخر زي الفريك مايحبش شريك!
سبب آخر وجيه يمنع الزعماء العرب من رفض المبادرة، فأمريكا "الصُهن" لم تشر من قريب أو بعيد في المبادرة إلي الصراع العربي – الصهيوني ( واخدين بالكم إن كلمة الصهيونية من الصُهن)..أي أن أمريكا تريد الشعوب والزعماء العرب والمسلمين أن يخضعوا لأمريكا أكثر .. و .. بدون مقابل ..
وكمان عايزنا نقبل مبادرة الشرق الأوسط الكبير.. ؟!
إلهي يا شيخ يقعد لك في عافيتك وولادك..!
ولا حتى بمقابل عهد مكتوب بحبر سري لقيام دولة فلسطينية على فتفوتة من ترابه الوطني..!
كلام ف كلام ف كلام ..!
دولة فلسطينية .. إيه ياعم اللي أنا كاتبه ده ..
لا .. لا..أنا كتبت صح..
أنا فاكر إن بوش مرة كده وعد الفلسطينيين بدولة فلسطينية طبقاً لخريطة الطريق اللي يودي!
لكن يبدو أن الطريق اللي يودي مش متسفلت كويس..عشان كده الدولة الفلسطينية لسه عليها شوية لغاية لما عمال بلدية محافظة واشنطن يبقى يرضوا عننا !
وكمان تعالى هنا ..
كيف تقوم دولة فلسطينية وجدار الفصل العنصري الذي تبنيه إسرائيل يأكل من 40% إلي 45 % من الأراضي الفلسطينية؟
طعمية طعمية .. وشك ف الجدار وقفاك ليا
جدار الفصل العنصري ، مش ده اللي هيمنع العرب من التضخم الديموغرافي داخل إسرائيل..
تضخم إيه لا مؤاخذة ؟!
يعني التضخم السكاني يا سيدي.
أصل الجدار أحد الوسائل الإجرامية لمنع الفلسطينيين من الإقامة في إسرائيل.
إسرائيل وقطاع غزة والضفة الغربية تضم حاليا 5.2 ملايين يهودي و 4.9 ملايين عربي فلسطينيون وعرب إسرائيليون..
ونظرا إلى نسبة الولادات المرتفعة لدى الفلسطينيين، ومع تراجع هجرة اليهود إلى إسرائيل ومغادرة نسبة من اليهود بلدهم بعد الانتفاضة، سيصبح السكان العرب أكثرية قبل نهاية العقد الحالي ..
نقطة أخرى :
طعمية طعمية .. وشك ف الجدار وقفاك ليا
ألم يقل الله تبارك وتعالى: "لا يقاتلونكم جميعاً إلا في قرى محصنة أو من وراء جدر" ..
فالجدار فيه حماية لليهود من عمليات المقاومة الفلسطينية التي لن تنتهي إن شاء الله إلا بزوال البقعة الوسخة من على البلوفر ..
رايحة فين يا فاطمة .. رايحة أجيب أومو
جاية منين يا فاطمة .. كنت بجيب أومو..
يعني يا عم بوش: ولا دولة فلسطينية..ولا كرامة..ولا حرية..!
وكمان عايزنا نقبل مبادرة الشرق الأوسط الكبير.. ؟!
إلهي يا شيخ يقعد لك في عافيتك وولادك..!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
علشان موكن احنا إعمل كل حاجة احنا اوزينهاهناك والناس كله يحب امريكا عشان امريكا كوي
بس انا حبش امريكا!
عشان امريكا قتل بيبي زي انا
وانا مش آوز أموت زي بيبي في عراق انا يشوف على تفزيون
بس ممكن اعمل كل حاجه انا عاوز ومش لازم انا اكون امريكي!!!!