..ورجعت من السفر!

الحكاية المرة دي عن تجربة سفر كانت من ثلاث سنوات بس حكاية تحفة وأحداث تحفة ونتائج تحفة. كلها تحف تتحط في متاحف.. ممكن بأه قبل ما أحكي نركز شوية واللي مشغل window تانية يقفلها ويشوف العجايب بجد.. ويشوف إزاي أن الواحد ممكن يحقق أحلامه بس لو تعب شوية..

المهم بدأت الحكاية لما كنت بزور أحد المواقع على النت وبعدين لاقيت pop up (يعني ويندو بتفتح لوحدها) بيتكلم عن إنك ممكن تحصل على الماجستير والدكتوراه من بلاد برة، وده حلمي بس مش حلمي الأساسي. المهم فتحت اللينك Link وشوفت إيه النظام. بدأت أعمل بحث عن الجامعات اللي برة وأشوف الأسعار شكلها إيه. وطبعاً الحاجة كلها حلوة جدا بس مولعة.

المهم رحت مشغل دماغي وقلت يا واد يا أتش ممكن تسافر تاخدلك كورس ولا اتنين وتعمل لك قرشين كويسين وهو مش هتصرف كتير والعملية تمشي إن شاء الله..

المهم أخدت رأي أبويا في الموضوع والراجل الصراحة رحب جداً بس بعد جلسات وحوارات . بدأت أفكر أروح فين أروح فين. وافتكرت ساعتها إن خالي قاعد في لندن بقاله 30 سنة وأنه ممكن يظبطني وياخد باله مني وكده. وبدأت من يومها أدور وأبحث عن مدارس اللغة الإنجليزية في لندن على أساس إني آخد كورس إنجليزي واشتغل فترة الأجازة وأعتمد على نفسي وأشوف الحياة ماشية إزاي..

أديها مصاريف

المهم لاقيت مدرسة اسمها الأنجلو سكول في لندن، وفي نفس المنطقة اللي ساكن فيها خالي الباشا. المهم رحت باعت جزء من الفلوس 100 جنيه إسترليني يعني 600 جنيه مصري وقتها (تحويشة العمر) المهم رحت باعتهم والناس محترمين جدا راحوا باعتين جواب على السفارة وإني أجهز حالي للسفر وكده.

المهم إن المشكلة كلها كانت في الفلوس وإن أبويا موافق على المبدأ.. بس يطلع فلوس صعبة شوية. المهم ما كنتش لسه دفعت مصاريف الأكاديمية. فكرت إني أسافر بيهم ولما أرجع إن شاء الله أبقى أدفعهم.. ودي أكبر مخاطرة أخدتها في حياتي؛ لأن المبلغ مش صغير والنتائج غير مضمونة بالمرة..

بس الحمد لله الواحد قلبه جامد رحت متفق معاهم في البيت على الفكرة دي وطبعاً 5 أيام عمال أقنع فيهم والحمد لله نجحت بس بعد ما طلعوا عيني وعين اللي خلفوني.

وبدأت أمشي في الإجراءات وعملت شهادة القيد وتصريح السفر وورق تأجيل التجنيد والحمد لله ربنا كان مسهلها معايا. ورحت رايح على السفارة وأنا مرعوب لحسن ما خدش التأشيرة.. بس سبحان الله أخدت الفيزا ورحت قاطع التذكرة ومظبط حالي وكل كده أنا لسه ما قولتش لخالي إني رايح له. المهم قلت أشد تليفون للراجل عشان ما تبقاش صدمة (أقصد مفاجأة) وفعلا اتصلت به وراح قايللي تشرف في أي وقت ورحت إديته بيانات الرحلة ومواعيدها ورحت قافل قبل الدقيقة التالتة.

يوم الوداع

ورحت مودع العيال صحابي وقرايبي وجيراني وأستعد يا معلم للرحيل. أبويا كان عمال يقولي يا هشام أوعى تروح ما ترجعش. لازم ترجع عشان كليتك ومستقبلك (بلدك محتجاك يا رأفت) والكلام اللي انتم عارفينه. ورحت رايح على المطار وركبت الطيارة من هنا وبدأت أحس بالمسؤولية بجد وابتدأ قلبي يخبط يمين وشمال. رحت قايل لنفسي أثبت وربنا هايسهلها إن شاء الله. ورحت مديها قراءة قرآن وأدعية عشان ربنا يستر ونوصل بالسلامة ونرجع بالسلامة.

وبدأت المفاجئات

وبعد ثلاث ساعات طيران لاقيت الكل بيربط الأحزمة عشان الهبوط. المهم أنا قلت يا جدعان لسه بدري وأسال الناس اللي جانبي راحوا قايلين إن فيه ترانزيت في المغرب والكلام ده ما كنش مكتوب في التذكرة.. بس عادي.

كلكم طبعاً عارفين شركة مصر للألبان (قصدي مصر للطيران) بتعمل إيه في رحلاتها. المهم قعدنا بتاع أربع ساعات لحد ما غيروا الطيارة وينقلوا الأمتعة والإجراءات دي. المهم رحنا راكبين طيارة تانية ومكملين الرحلة وساعتين ووصلنا مطار لندن الدولي..

كانت الساعة 4 الفجر وأنا كنت متفق مع خالي إني ها وصل على الساعة 11 او12 بالكتير أوي. المهم نزلت المطار (يخرب بيت النظافة والنظام) المهم ما لاقيتش أي حد مستني روحت قايل أهلا أهلا بالمفاجآت.

كان معايا العنوان بتاع خالي وهو كان واصف لي البيت بالمواصلات وكده المهم قلت إديها اعتماد على النفس أما نشوف أخرتها إيه. ورحت راكب المترو (حاجة تعقد) ونزلت في المحطة اللي كان قايل عليها واتمشيت شوية ووصلت البيت بتاعه من غير ما أسأل أي حد، لأن كل حاجة مكتوبة وموضحة وزي الفل.

الوصول بالسلامة

وصلت لباب البيت ولاقيته جاي من ورايا وإديها بوس يا معلم، وواحشني وكده. المهم دخلت معاه البيت ورحت نايم لحد الضهر. المشكلة إن لندن ما فيهاش لا ضهر ولا عصر وكلها ضباب وشبورة. وقلت أروح أزور المدرسة اللي هادرس فيها وأنا ماشي عمال أكلم نفسي أني لازم أدور على شغل وكده.. وقلت بلاش أكلم خالي في المواضيع دي عشان ما يفتكرش إني رايح له مصلحة.

بس رحت مظبط حالي في المدرسة ولاقيتهم عاملين كارنيهات للناس اللي جاية من برة لندن عشان المواصلات وتخفيضات على بيوت الشباب ولاقيتها رخيصة ومدعمة. فكرت أني أقعد فيها منعاً للإحراج وكمان عشان أقعد مع ناس تانية وأحسن اللغة عندي. ورحت مكلم أهلي في مصر عشان أطمنهم وراحت أمي قالت لي إن ابن عمها قاعد في لندن وممكن يساعدني أحسن من خالي وراحت مدياني نمرة التليفون وأنا رحت مكلمه على طوول والراجل رحب بي ترحيب الأبطال والصراحة ظبطني جامد قوي (ربنا يبارك له).

دراسة بجد ومافيش دلع

بدأت الكورس والانتظام في المذاكرة والدح عشان أنا مش قاطع كل المسافة دي عشان أتدلع. المهم الكورس كان مدته 3 أسابيع. خلصت بدري بدري.. ونجحت بامتياز الحمد لله وفاضل لي 4 شهور في الفيزا وبدأت الاستعداد للعمل وتعويض المصاريف اللي اتصرفت. وابن عم والدتي راح جايب لي شغل كويس بس في السر؛ لأنه غير قانوني إني اشتغل وأنا رايح زائر.

طيب أنا كنت شغال إيه ؟

المهم الحمد لله ربنا كان ميسر لي الأمور، وكانت أجدع شخصية ساعدتني الحمد لله كانت عربية من المغرب ومجوزة مصري!! المهم إنها كانت ماسكة هيلتون في لندن وكانت مسئولة عن المؤتمرات والمعارض اللي بتتعمل. الصراحة أنا كان عندي انطباع إن الفنادق كلها في الدنيا بيتعمل فيها أفراح وكده..

بس للأسف أتضح لي إن الأمور أسهل من كده بكتييير. أنا كنت بشتغل فني في قاعات المؤتمرات والمعارض اللي موجودة في الفندق. الحمد لله عرفت ناس محترمة كتيير وناس بتكافح واللي كان مشجعني إن فيه إنجليز بيشتغلوا شغلانات بسيطة زي الأجانب. وده اللي خلاني أؤمن إن مافيش

غير لغة واحدة بين كل الشعوب وبين كل الجنسيات باختلاف اللغات. عارفين إيه هي اللغة دي. لغة العمل والحماس وإثبات الذات.

أيام وأسابيع والوقت يجري

وتمر الأيام والأسابيع وخالي قاطع خالص ولا بيسأل ولا أي حاجة. المهم عملت فلوس كويسة الحمد لله بس بجد طلع عيني وكنت قافش على نفسي لان الحياة غالية قوي قوي. بس في نفس الوقت كنت بخرج واتفسح بس من غير صرف جامد قوي. والحمد لله وصلت للمبلغ اللي صرفته قبل السفر وقدهم مرة كمان ورحت رايح لخالي ومسلم عليه ومودعه عشان الاستعداد للرجوع وجيبت هدايا لابن عم والدتي ومراته عشان هم ظبطوني في الشغل وكانوا مراعيني وبيسألوا عني.

وحان وقت الرجوع للوطن يا باشا وأنا فرحان جداً عشان أنا نجحت في المجازفة وحققت أهدافي وزيادة كمان. ورجعت مصر ومالقيتش حد مستني برده قلت مش مهم رحت راكب التاكسي ورايح على البيت ومخبط على الباب لاقيت والدتي بتفتح وراحت وخداني في حضنها والعيال إخواتي وأبوبا.. وأنتم عارفين الدراما دي. ولاقيتهم بيقولوا لي إنهم كانوا نازلين يجيبوني من المطار بس الحمد لله أني ما تعبتش حد والأمور كلها كانت ماشية كويسة وزي الفل.

وأمي راحت محضرة الأكل وقعدت جانبي وتسألني عملت إيه وبالتفاصيل وقعدنا نرغي ونتكلم لحد الصبح. أحسن ما في الموضوع ده إن الواحد ممكن يعمل اللي بيحلم به مهما كان بس يحسبها صح ويستعد لأي تكاليف والاهم يستعد للتضحيات وبذل الجهد. وربنا يسهلها معانا كلنا ونحقق أحلامنا..!