حب المصايف.. تفاريح وأسيتون!!
الدنيا حر والجو خنقة والناش زهقانة.. وطبعا كل واحد عاوز يرطب الجو.. بطريقته.. ناس تتمشى على الكورنيش، وناس تشغل التكييف.. والباقي بيحبوا!
نعم، فالحب الذي ينشأ بين الشباب والبنات في فترة المصيف تجربة مر بها الكثيرين. ولكن هل هو حب حقيقي، أم انه مجرد ملء للفراغ العاطفي بعد التخلص من أعباء الدراسة. وهل يمكن لهذه العلاقة أن تستمر، ولا على رأي أنغام "ده كله وهم وطيف.. وأهو انتهى بنهاية الصيف"!!
أسيتون!!
أحمد مؤمن، 21 سنة، وطالب بكلية التجارة، يصف علاقات المصايف بأنها [تفاريح] و " وكل إنسان بيحاول يجدد الأجازة بطريقته ويضيع الملل اللي فيها"!!
أما هبة فتحي، 26 سنة ومهندسة ديكور، فتقول: "أنا من رأيي إن حب الصيف زي الأسيتون يطير بسرعة لو أنت مش قادر تحافظ عليه وتهيئ له بيئة مناسبة، حب طياري. يعني البنات أو الأولاد بيكون هدفهم قضاء الوقت والتسلية والخروج، فلا يكون هناك مجال للكلام وتقريب وجهات النظر، وتنتهي الأجازة وينتهي معها الحب.. اللي أكيد مكانش حب"!!
وتتفق معها نهي منير،19 سنة، كلية الفنون الجميلة فتقول:"صعب نقول عليه حب لأنه في الحقيقة لا يمت بصلة للحب المعروف ولكنه نوع من أنواع التجديد "الغريبة" والغير مقبولة وطبعا السلوك ده يعتمد في البداية على الأسرة والتربية ... يعني مفيش بنت متربية كويس هتروح تحب ولد لمجرد إنها تخرج وتتسلى."
طرقعة
"الناس بتتجنن في الصيف ومخها بيلسع، وحب الصيف هو أكبر دليل على كده. وبالتالي إحنا المفروض نسميه "جنون الصيف"!! هكذا يصف أيمن "المطرقع" ما يمر به الناس في هذه الفترة.
أما سماح شكري، 21 سنة، آداب إعلام فتقول: "حب الصيف زي الموضة كل يوم تقليعة جديدة يعني ممكن بعد شوية الواحد يلاقي حب الربيع بحجة إن الدنيا ربيع والواحد محتاج حد يشاركه فرحته أو مثلا حب الخريف عشان الواحد بيبقى عنده اكتئاب وعايز حد يفك عنه وهكذا ... اللي يعيش يا ما يشوف!!"
زواج على البلاج
وترفض رباب، 23 سنة، الحكم على حب المصيف بالفشل، فزواجها السعيد بدأ بقصة حب.. على البلاج...
" أنا وزوجي التقينا للمرة الأولى في المصيف وجمعتنا أشياء كثيرة مشتركة. وبعد العودة لم تنقطع اتصالاتنا، وتقدم للزواج مني ووافق أهلي. وقد رزقنا الله بابنة جميلة تنير حياتنا ونعيش حياة عائلية سعيدة ومستقرة وكان من الممكن أن تكون مشاعرنا مجرد حب صيف ولكننا حافظنا عليها لتستمر إلى الأبد."
وتحكي انجي، 19 سنة، تجربة مشابهة ولكن نهايتها لم تكن بهذه الوردية: " كانت لي صديقة أحبت شاب في المصيف أثناء الأجازة، وجمعت بينهم علاقة قوية جدا. في بداية الأمر تصورنا جميعاً أنهما سوف ينفصلا مثل أي طرفين تجمعهم علاقة عابرة. ولكن خابت تصوراتنا وتمت خطبتهم. وبعد ذلك بحوالي شهر تلقينا خبر وفاته في حادث سقوط طائرة. ولولا ذلك لتوجت قصة حبهما بالزواج."...
وأنت هل خرجت من المصيف بلا حمص .. قصدي بلا قصة حب، أم طالتك لسعة من هوا المصايف لتترك معك ذكرى لعام.. وأعوام...
ايزي موزو مش حب وجواز
ممكن نصيف من غير ذنوب
صيف الكنائس مهرجانات ورهبنة وفسح
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
بعدين أحب ولا محبش مش مشكلة
إيه يا جماعة العبقرية غي اختيار المواضيع دي
حلفتكوا بالله تقولولي بتاكلوا ابه
بجد هايلة
لو الموضوعات خلصت قولولنا بدل الهيافه دى
معلش لسه صاحي من النوم ...حب ايه ياجدعان اللي بيطلع في الصيف ..
ده حتي الدنيا بتبقي حر وخنقة وموش طالبة وجع دماغ ...
بصراحة أنا بحب في الصيف حاجة واحدة بس ...
البحر والمياة والهواء....اللي في الساحل الشمالي طبعا ...
سلام ....رايح آخد غطس ....
جايلك يا بحر :)
انا رايحة المصيف ارتاح من وش مديرتي العكر
الله يبعت لها سفرية لبلاد تركب الافيال و يبعدها عن طريقي
انا كل نشاطي في المصيف
انام اصحي اكل اصلي انام تاني
كفاية قوي........
بس للاسف مافيش هناك خط تليفون اخش بيه على النت علشان ارازي في البشرية
ايه ده ...
يظهر انا متراقب وشايفين اللي انا باكتبه
لحقوا يشوفوا اللي انا باكتبه في عشرينات ؟؟؟
شارون بعتلي تذكرتين نيوزيلاندا اصيف على حسابه وابعد عن عمليات الموساد في فرنسا ...
المخابرات السعودية بعتولي بيقولوا نبوس ايدك روح صيف وحل عن ال سعود ...
والاخوان المسلمين بيلموا من بعض علشان يدفعولي اروح اصيف ويخلصوا من لساني ...
ومباحث امن الدولة ما كانوش عارفين يصنفوني كاتب اسلامي ولا كاتب شيوعي دلوقتي صنفوني ((من الاخوان المصيفين)) ...
انا كنت متوقعة انى الاقى موضوع الاول وبعدين اراء لكن للاسف ما لقيتش .
بس يا جماعة ما تظلموش الكاتبة يمكن تكون لسة مبتدئة وهم عدلو فى موضوعها وغيروة فغيرو من وجهة نظرها الصحيحة.
واحنا كتير بنسمع عن تغيير المواضيع وخاصة اذا كان كاتبيها من الشباب.
شكرا. ولا تغضبى يا اميرة من التعليقات.