أيام الجيش ما تتنسيش!
أيام الجيش لا يحبها كثير من الشباب بسبب صعوبة الحياة العسكرية، وشدتها، وما بها من أوامر ونواهي، وفروض وطاعة وحبس وتكدير وحلاقة على الزيرو، بالإضافة إلى فراق الأهل والأحباب، والحياة بعيداً عن الأسفلت، زي ما بيقولوا.
ولكن بالرغم من ذلك، فإن الفترة التي يقضيها الشاب في التجنيد، سواء طالت أم قصرت، لا تخلو من بعض المواقف، التي تظل محفورة في الذاكرة طول العمر، لأن أيام الجيش ما تتنسيش.!!
"مخالي شِل"
الكثير منا يتذكر هذه الجملة، التي جاءت على لسان (الشاويش عطية)، شاويش السينما المصرية، عندما قالها للعسكري رجب في أحد أشهر أفلام الفنان الراحل إسماعيل ياسين.
ومخالي هي جمع "مخله"، وهي التي يتم بها تجميع المهمات والمتعلقات الخاصة بكل عسكري، وعن هذه المخله يحدثنا (أشرف مصطفى) فيقول: "من الأمور المعتادة في التجنيد .. قيام بعض العساكر الذين يستعدون لإنهاء الخدمة وتسليم المخله، بسرقة بعض المهمات الناقصة لديهم من زملائهم الجدد، ورغم حرصي في بداية فترة تجنيدي على ألا أتعرض لذلك الموقف – سرقة حاجة مني يعني- إلا أنني وقعت في الفخ، ولم يكن أمامي إلا أن أفعل مثلما فعل السابقون.
أما بداية الحياة العسكرية لمحمد نور، فقد كانت بعقاب قاسي تمثل في حلاقة شعر رأسه (أكثر ما هو محلوق)، بسبب قيامه بالضغط بقوة على أسنانه اعتراضاً على بعض الأوامر، ويقول بعدها تعلمت الأدب وأصول الحياة العسكرية والرضا بأي أمر مهما كان.
أجازة في الحبس
يتذكر إسلام المليجي يوم قيام قائد الوحدة العسكرية بإجراء مسابقة للجري لمسافة طويلة، ويقول : "بعد أن أعلن القائد عن المسابقة، ووضح أن هناك جائزة للفائز بالمركز الأول، هي أجازة لمدة ثلاثة أيام، طمعت في الجائزة رغم قدراتي المحدودة في الجري وشدة الحرارة في ذلك اليوم.
المسابقة كانت من نقطة معينة إلي أخري، ثم العودة إلى نفس نقطة البداية، ففكرت في الاختباء في مكان معين قريب من البداية بعدما بدأت الجري، ثم ظهرت مرة أخرى قبل وصول الآخرين، وتظاهرت بإنهاء السباق، وبشدة التعب من الجري إلا أنه فاتني مسألة غياب العرق، مما أدى إلى اكتشاف أمري، وفعلا فزت بأجازة قدرها ثلاثة أيام ولكن في الحبس.!
بالإضافة إلى وابل من التقدير الواجب والكلام المتنقي وطبعا الباقي معروف"..!
ضفادع مشوية!!
من أصعب المواقف في الحياة العسكرية يرويها لنا ياسر أحمد فيقول كنت مجنداً في سلاح الصاعقة، وكنت أسمع عن قيام المجندين في ذلك السلاح بتناول الضفادع حية بالأمر العسكري إلى أن جاء اليوم الذي تعرضت فيه لذلك الموقف، فقمت بإمساك الضفدع، وضغطت عليه بقوة، وأغمضت عيني إلى أن أديت الأمر ومرت العملية بسلام، ويعتذر ياسر إن كان قد أصابنا بشئ من "القرف"، لكن الجيش كله كده.!
اللي ميعرفش يقول عدس
وما زلنا مع الطعام العسكري إلا أننا سننتقل هذه المرة من الضفادع إلى الطعام الشعبي والوجبة الرئيسية في التجنيد، وهي... العدس.
هشام مصطفى يؤكد أن العدس العسكري يشبه إلى حد ما العدس المدني، إلا أن به بعض المواد السوداء، والألوان الغريبة، التي كان يحاول أن يتعامى عنها في الكثير من الأحيان، ورغم أن العدس كان من الأكلات المكروهة لدى هشام قبل أدائه الخدمة العسكرية، إلا أنه قد تحول إلى طعامه المفضل بعد أدائه الخدمة، بعد (عِشرة) دامت سنة كاملة، ويختتم هشام كلامه: "بأن اللي مدخلش الجيش.. فأنه لا يعرف الطعم الحقيقي للعدس .. وصحيح اللي ميعرفش يقول عدس".
18 ساعة كشف طبي.!
أطول وأصعب يوم في حياة عماد منصور هو ذلك اليوم الذي قضاه في منطقة التجنيد من أجل إجراء الكشف الطبي قبل الالتحاق بالتجنيد، فيقول : "ذهبت إلى منطقة التجنيد في السابعة صباحاً، وغادرتها في الواحدة والنصف بعد منتصف الليل، بسبب الروتين والزحام، وطوال هذه الـ 18 ساعة، كانت الحمامات كلها مغلقة في منطقة التجنيد.!!
قضيت وقتا طويلاً في البحث عن حمام، وكلما مر الوقت يزداد الموقف صعوبة، إلى أن نجحت أخيراً في العثور على أحد الحمامات، والدخول إليه بعد أن تجاوزت طابور مقداره ثمانية أفراد.
كلمة السر
لحظات من الرعب عاشها عصمت حسين عند عودته إلى وحدته العسكرية بعد انتهاء إحدى الإجازات، فيقول: "كانت وحدتي العسكرية في قلب الصحراء مما يضطرني إلى السير مسافة كبيرة في الرمال بعد النزول من السيارة، وبعد أن مشيت مسافة طويلة، وكان الوقت ليلاً، والظلام دامس.
فوجئت بأني أمام الوحدة دون أن أدري، وفجأة مسح كل شئ من دماغي، ثم استوقفني أحد العساكر تحت تهديد السلاح طالباً مني الإفصاح عن كلمة سر المعسكر.
دماغي بقت زي الصحرا .. مش فاكر أي حاجة .. فأقسمت أنني عسكري تابع للوحدة، ولكني لا أتذكر كلمة السر.!
ويستطرد عصمت قائلاً، كم كانت لحظات مرعبة عشتها إلى أن جاء قائد الوحدة وأقر بتبعيتي للمعسكر ونجوت ولله الحمد.
وبعد انتهاء هذه الجولة العسكرية وما بها من مواقف صعبة، يتذكر دائماً من دخل الجيش هذه المواقف ويضحك، بعد أن مرت أيام الخدمة والطابور، والصحبة الحلوة بكل خير.
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
واللى يرجعنى تانى ابوس ايديه
كفاية النظام اللى بنفتقده فى الملكية
الكلام فى الجيش كلمة وكلمة
مافيش مناهدة زى الملكية"المدنية يعنى"
يعنى تسمع مرة واحدة وتقول مرة واحدة ويبقى علم وجارى التنفيذ
مافيش محايلة
بصراحة لو الميرى تم تطبيقه على الملكية"اللى هى زى ما قلنا المدنية"
هايتصلح حال البلد جدا
الله يجازيكم ليه تفكرونا بأيام يا رب تعود بتعبها وقرفها وصحبتها الحلوة
ومش هاكون كداب لو قلت بجزاءاتها وحبسها
يالا السلام عليكم بقى
رقيب مجند مؤهلات سابقا
يبدو إنه كان بيشتغل سيكا ( يعنى تخصص غسل وكنس عند القائد)
هى فعلا أيام ماتتنسيش لأنها أيام سودة السجن فى المعتقل أرحم منها
كنت داخل الجيش فاكر أنه شرف ودى خدمه للوطن
بعد ما شفت الذل وأتشتمت فبه واتهانت كرامتى
بقيت بكره البلد دى بجد
ومش قادر يستغنى عنه
يبدو أن الجيش كان له متوى يعنى مآوى
ذى ماهو متوى لناس كتير
أنتو عارفين هى أيه ؟؟؟؟؟؟
مشكله الشذوذ عند الشاويشيه
مرة قابلت شاويش كان هايبوس رجلى و انا رفضت
دة غير اللى سمعته من الزملاء عن شاويشيه كتير بنفس النظام
يجب تطهير القوات المسلحه من هؤلاء العفانه
علشان ميبوظوش العساكر
بس سبحان الله فية كمية قلة أدب وعدم إحترام لإى إنسان مهما كان وشتائم وتهزيق ووساخة تلاقى حتت عسكرى ( برص ) بيتكلم بإسلوب فى منتهى الوطيان والسفالة .
حصلت معايا أنا شخصيا جية حتت عسكرى بتاع 2 ميجا كدة مالوش أى لزمة فى الوجود ولنكتة واقعة وحالتة نيلة جية يقولى إنتا يا إبنى (إبنك ) !!! حط ورقك تحت رجليك ودوس علية طبعا أنا إتخانقت وكلمتة بكل إحترام وقولتلة أنا إسمى عبدالله وصعب أحط ورقى على الأرض علشان إسم ربنا قالى أنا بقولك حط الورق تحت رجليك الإتنين كمان .. طبعا رفضت فما كان كمة الا ان شتمنى بأمى المريضة طبعا أنا كونى عصبى فكلتة كام ألم إنما اية عسل وقولتلة يا حتت خارية أنا كذا و كذا وكذا (ليا ضهر يعنى ) وخد عشر أيام حبس طبعا صعب عليا جدا فطلبت من القائد أن يسامحة وتكلمت معة برفق وقولتلة متزعلش . دة كان ايام مكنت بقدم ورقى من فترة بس الحمدلله خدت إعفاء علشان نظرى ضاااايع .
عبدالله فرج
يقوللك أيه ياعسكرى دة انتا لسه مستجد ياعسكرى
ياعسكرى دة أنت الأكل الملكى لسه فى بطنك يعنى أكل البيت لسه مجاش مكانه أكل الجيش المعفن فى بطنك
يعنى الأكل اللى أنت كلته فى البيت لسه مانزلش بالعربى وخلى بالك من ياعسكرى دى وهو بيقولها تحس أنها سبه أوعار أنك عسكرى
ويظل هذا العسكرى المستجد المسكين يرزخ تحت وطأة العساكر القدامى
ألى أن تنكشف عنه الكربه وتخرج دفعه وتأتى دفعه أحدث منه وينال شرف الأقدميه البلهاء فى هذا المرستان المسمى بالجيش
وتقولى جيش
عندما يدخل المؤهل العالى الجيش يجد نفسه مستجد وملوش أقدميه أما العادة اللى ساقط ابتدائيه ولااعداديه بيكون اقدم منك ومعنى الأقدميه هنا أنه ممكن يكدرك ويزحفك ويرقدك ويمسح بكرامتك الأرض تخيل حضرتك ساقط اعداديه يعمل فييك كدة وانت ابوك صرف عليك دم قلبه فى تعليمك 16 سنه
والآخر الجيش يجيب لك ساقط اعداديه يهزك بالذمه ده معقول ؟؟؟؟؟؟؟؟
طبعا معقول فى مصر اللى ماعندهاش احترام لأبنائها
المفروض ياسادة المؤهلات العليا يبقى ليهاأقدميه مش علشان عيل بشخه دخل قبلك الجيش يبهدلك بالمنظر ده ..طبعا بشخه لأنه أصغر منك فى السن
دا مفيش أحترام للسن فى الجيش
يبقى هيبقى فى أحترام للمتعلم
وسلملى على الجيش
ماهو مش معقول تدخله ضابط احتياطى وفى نفس الوقت تدخله عسكرى مستجد أقل من اللى ساقط اعداديه
ده كلام ياجيش
تهين ولاد الناس كدة
لدرجة اننا كنا بنتمني انه تحصل حرب في اثناء خدمتنا مش عشان نقتل العدو ولكن عشان اول ما نقتل نقتل القاده بتوعنا الكبار قبل الصغيرين .!!!!!!
طبعا مش مصدقيني
والله العظيم انا لو حكيت عن سنة الجيش ما يكفيني ولا مليون صفحةّّ!!!!!
انا مش عارف ازاي السكوت علي هذه المهزله ويقولوا الجندية شرف ؟؟؟
ومتهيألي جيل من العساكر اللي بيهدروا كرامته مش هايقدر انه يحافظ علي كرامة البلد طب ازاي قولولي حد عاقل يرد عليا ويقولي ازاي نقدر نحارب بجيل فقد ادمييته علي باب التجنيد ؟؟؟
صدقوني والله انا خارج من الجيش منذ 10 سنوات ولا زال بيجيلي كوابيس عن اللي اسمه جيش ده لدرجة ان الواحد كان بيتمني انه يموت في الجيش حتي لو كان فاضله ايام ويخلص . بس احسن حاجة في الجيش ان الواحد بيتعامل مع جميع انواع البشر عشان ياخد مناعة ضد البشر اللي مش ولا بد يعني واخيرا اطيب التحايا للجميع واتمني لكم وقتا ممتعا
لأن الشاويشيه والظباط كان بيكلوهه وسيبونا جواعه طول النهار
لدرجت أن أنا كنت أنزل جازة آكل بشراهة وأمى تقولى أنت مفجوعه
أقولها الجوع ........الجوع ....... بيجوعونا
وحسبنا الله ونعم الوكيل
ضيت سنه فى الجيش لو كنت قضيتها فى المعتقل كان ارحم
شوفت الرعب على أصوله والجوع على أصوله والشتيمه على أصولها ولو اتكلمت ودافعت عن نفسك اعرف انهم هيصتقصدوك لغاية ماتفقد وتعيد مدة الخدمة من جديد
يبقى الأحسن تسمع شتيمتك وتسكت ومنها ياحمار ياابن الحمار يا *** يا *** يا *** وغيرة
أقول كمان ووووووووولا كفايه كدة