سيبونا لوحدينا... أنا وربنا!!
مبدئيًا.. أنا عارف كل حاجة.. طبعًا كتير بيسألوني هتكلمه بأنهي وش.. هتطلب منه إزاي.. وأنا جاي والله شايل كفني على إيدي.. ومستعد تمام الاستعداد لأي شيء.. مش اسبتياع ولا فتونة وفتحة صدر لكن ذل وخضوع..
جاي لله وأنا وشي متمرغ في التراب.. والكسوف قاتلني ورقبتي وجعاني من الدلدلة اللي هي فيها.. وعيني مش قادر أجبر كسرتها.. لأني بقى لي كتير… كتييير بعيد..
ماشي براحتي وأنت سايبني.. عمَّال أعك وأنت بتقول يمكن ييجي ويتعلم ويرجع.. وغيبتي طولت ورجعتي اتأخرت .. وعلى فكرة أنا مكنتش مبلط في الخط ورافض أرجع كل الحكاية إني كنت كل أما أرجع أقع تاني.. بصراحة ما كنتش مية مية في رجوعي يعني بأقدم رجل وأأخر رجل.. أصل المطبات كتيرة كتيرة جدًا على واحد ضعيف زيي.
لكني أديني جيت ومجيتي المره دي مش مجية خايبة فاضية.. مجية شكلية عشان أبقى عملت اللي عليا.. لأ والله دي مجية صح.. مجية راجل.. ومش داخل على بيتك بإيدي فاضية أنا جاي وحياتي في إيديا مددهملك تعمل فيهم اللي تحبه تصرفهم زي ما تشاء.. والإيد التانية فيها قلب.. اسود شوية عارف.. مخّوخ ناشف.. مصدي.. ما أنا عشان كده جيت لك عارف إن بيتك بيت النظافة مهما نسود ونتحرق برة نيجي وننضف نفسنا عندك.. ما أنت اللى قلت.. وأنت اللى عملّت وأنت اللى بتحكم..
بيقولوا لي مش هتقبل.. وأنا بضحك عليهم.. إزاي مش هتقبل ده أبدًا ما يسد بابه في وش حد.. ده مهما الواحد يبعد عنه ويهرب من طريقه لو بس فكر يرجع مجرد تفكير.. تلقاه يقبله ويطيب خاطره ويطمنه ويجازيه كمان.. وآل إيه عشان ذنوبي كتيرة هي ذنوبي كبيرة آه بس مش أكبر منه أبدًا ده هو الكبير. ولو عظيمة برده مش أعظم منه ده هو العظيم.
غيبتي طولت بقى لك كتير باعكّ.. ما أنا عارف بس هو لو لقى فيّ مجية راجل جدع ندمان ومكسوف من نفسه هيقبلني وهابقى مية مية.. صدقوني..
انتو عارفين ولا يوم ساب اللى جاله واتخلى عنه.. ما نتوش فاكرين.. ده وقف جنبي كتير.. أنا باحس أنه بيحبني والله بيحبني.. أنتوا عارفين سهل لي الحال إزاي.. واقف جنبي في شغلي وموسع عليَّ رزقي ومبارك لي في أهلي ومالي.. ومريحني في حياتي وساترها معايا كتير كتير قوي يا نهار أبيض لو ماكانش مجملها معايا بالستر.. كنت ضعت.. وده كله وأنا بأعك أمَّال وأنا جي تايب.. وسايب له أمري وأنا بحبه وعارف كويس ومتأكد أنه بيحبني.
بيقولوا لي ربنا عادل وهيحاسبك على كل صغيرة وكبيرة..
سبحانه وتعالى عادل ورحيم كمان وغفور وبيحب اللي بيتوب!!
وبعدين دايمًا بيعامل البشر بالرحمة هو سيدنا يونس لما زهق من أهله ومشي مين اللي نجاه من بطن الحوت.. وموسى لما رمى اللوح مين اللى تاب عليه.. ويوسف مين اللى خرجه من السجن وخلاه ملك وجمع عليه مال وأهله.. وإبراهيم مين انقذه من النار وخلاها له جنه.. يا جماعة صدقوني هيرحمني صدقوني هيغفر لي أنا عارفه كويس مش مصدقين مش مشكلتي إنكم مش عارفينه.
لكن أنا متأكد والله متأكد.. وانتوا مالكوش دعوة...
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
أنا متأكدة إن ربنا لن يردنى لأنه قبل كدة استجاب لأبليس عندما سأله أن ينظره إلى يوم نبعث ويأجل عذابه..فاستجاب الله عز وجل .
وكمان وربنا عندما يسأله العبد المطيع يقول لبيك عبدى ، ولكن عندما يسأله العبد العاصى يقول لبيك لبيك لبيك عبدى فالله اكثر فرحة بعودة عبده من الذى تعود اليه ناقته وحاجاته حتى انه قال اللهم انت عبدى وانا ربك.
باللا اسعدوا ربكم يأهل الله..
في الحقيقة مضمون الرسالة ومضمون المقالة مكرر وهناك الكثير من المقالات التي تحث على العودة والتوبة ولكن ينقصها أدب الحديث عن الذات الإلهية وتقديس وإجلال اسم الله
هذا الأسلوب الذي اعتدنا أن نراه في أديان أخرى حيث الاعتقاد بأن الله ثالث ثلاثة والله واحد أحد فرد صمد.
وأقصد هنا أن مهما كان الهدف هو تبسيط المعنى أو التلقائية فلا ينبغي أن يقلل هذا من إجلالنا للعظيم ، العال، المتعال ، المتكبر، ذو الجلال والإكرام . وحتى لو نظرت لأسماء وصفات الله التي توحي بالرحمة والغفران لا تشعر أبدا بنقصان العظمة بل تؤكد عليها في باقي الصفات الإلهية
لا انتقد هنا النص أو عنوان المداخلة الذي هو عنوان المقالة بل أرغب في أن نراعي أصول الحديث عن الله سبحانه وتعالى مهما كان كلامنا تلقائي .
ولو أن الفرد بيتكلم عن رئيسه في العمل هيقول الريس قال الريس عمل الريس كذا .. وهكذا ما بالك في رب العزة جل شأنه ولن تشقى أو يشقى أي فرد في أن يأتي بالعبارات المعبرة البسيطة الوقورة في نفس الوقت ..
وعذرا للتعليق
أسامة
منقول من ساحة حوار إسلام أون لاين تعليقاً على الموضوع
؟؟؟؟!!!!!!
حتى حسن النوايا لا يعفى من المسئولية يا جماعة ؟؟؟
هدف المقالة معروف وواضح ... لكن الأسلوب مصيبة ؟؟
الله جل و على لم يتحدث عنه الرسول إطلقاً مطلقاً بهذا الأسلوب أبداً ... لم يذكره أبداً إلا بإجلال سبحانه و تعالى
سؤال يوضح الأمر .... هل تستطيع أن تتحدث بهذا الأسلوب مع مديرك مثلاً ... أو مع المحافظ أو رئيس الجمهورية ؟؟؟!!!
التبسيط لا يعنى التحدث بهذا الأسلوب أبداً
عموماً جزاك الله خيراً على حسن نواياك
و غفر الله لنا و لك