هناء و شيرين

بعد غيبة طويلة رجعانلكم بحكايات طويلة ومغامرات جديدة، ونرجع نفكركم بينا تانى إحنا صاحبتين مغتربتين مع عائلاتنا منـذ الأزل ولسه في الغربة وبنحاول نظهر سلبيات الغربة دي علشان منفكرش أبدا إن ده يكون مصير ولادنااا..

مش هنطول عليكم وهندخل في الموضوع مباشرة (موضوع الطفش والزهق يعنى)!!

زي مثلا وأنا قاعدة دلوقتي بانسخلي الموضوع كام مرة "بدون سبب يذكر" علشان أعرضه بكرة على هناء في المستشفى - بتتفسح لا داعي للقلق- قبل ماتشوفوه.. المهم إحنا هنتكلم على الزهق والطفش والي بيلاحق كتير من أبناء الغربة زايينا، وطبعا ده سببه الرئيسي عندى وعند هناء إن ملناش صحاب غير نفسنا بعد ما قطعنا كل صحابنا من الجنسيات التانية بعد ما شفنا منهم العجب؟!؟

صحيح إحنا بنشغل وقتنا في حجات مفيدة زاي المشي والقراءة والنت بس بتفضل في طاقة "مجنونة" و"مكبوتة" لازم نطلعها وبنطلعها طبعا مش بنزعلها..

دليل الطفشانين

أول ما تلاقي نفسك طـافي وزهقان ومش عارف أنت فين.. وليه.. وعشان إيه.. استخدم واحدة من الطرق دي أو كلها لو حالتك صعبة أوي:

• سوق عربيتك قداااااااام مركز المرور وأنت معاكشي رخصة.

• إذا مرة طفشان وأنت بايعها، روح للإدارة العامة لمكافحة المخدرات، ويكون في جيبك كيس دقيق أبيض.

• افتح على قناة إخبارية صينية وتابع الأخبار، وهز راسك واعمل نفسك فاهم.

• اخترع لغة ما يفهمهاش حد غيرك.. وكلم الناس بها..

• روح مباراة الأهلي والزمالك وامسك علم البرازيل وشجع

• ويا عم لو طافي على الأخر ومش قادر تخرج من البيت أدخلك على منتدى ونزلك موضوع على الخضار والفواكه في القسم السياسي.

• ولا رد على موضوع بيتكلم على سامي يوسف وأشكر في عمرو خالد ..

• ولا أقولك أدخل باسم المشرف ورد على الأعضاء.

• ولا خد لك اسم عضو أو عضوة وأعلن خبر خطوبتهم..

سكتك والنبي يا أسطى

وعلى فكرة الطرق دي معروفة عند كتير من الناس ونتائجها مضمونة.. والضمان علينا.. ومجربة.. يعنى مثلا من طرقنا إحنا الأتنين لما نكون طفشانين نرفع سماعة التليفون ونتفق نقابل بعض.. وعلى الشارع ونوقف تاكسي بجد مابنكونيش عارفين على فين؟!..

ولما يسألنا التاكسي "وين ماما؟!" (بالهندى) نقوله علاطول ونضحك وكل مانعدي على مكان نقول هنا لأهنا لأخلاص هنا ولا أقولك علاطول تاني.. بصراحة في منهم بيزهق وينزلنا في الشارع، وفي بيرجعنا تانى البيت.

ياللا نروح الخرابة..!

وفي مرة بصراحة صحينا الصبح ومالقناش حد يخرجنا فاتفقنا نعيد الكرة بس مش عارفين تانى فين؟؟ وشوية بنفتح التلفزيون وسمعنا خبر تفجير السفارة!

قولنا مفيش أحلى من دي خروجة وخدنا التاكسي لكنه خاف على نفسه ونزلنا قبل السفارة

وجري والشوارع كانت متروسة عساكر مستانين إرهابي يطلع من هنا ولا من هنا ويفاجئوا ببنتين طالعين لهم في وسط الشارع تايهين طبعا وهى تقولي" لو مسكونا هقول ماعيش هوية.. وقبل ما يرحلونى على بلدي هكلمهم كام كلمة فرنساوي وأخليهم يرحلونى على فرنسا!!

وأنا قولتلها "صراحة أنا هروح مع الإرهابيين هما أكيد عايزين حد يطبخلهم وربنا يكتبهالي شهادة"..

بورما - بانكوك للعمل الخيري!

مرة تانية معرفش عملنا ليه كدة بس بجد ماكوناش عايزين نرجع للغربة تانى بعد شهر..

أجازة إحنا الاتنين في مصر قولتالها نعمل زي "home alone" (يعني "وحدي المنزل" علشان كل واحد وعلامه).. ونعدي من الصالة الأولى بتأشيرتنا وتذكرتنا عادي ونحاول نفلت من الصالة التانية وناخد طيارة على بلد تانية.. وبجد روحنا مكتب الطيران وأنا اخترت بورما معرفش ليه وسألت الموظف ..لو سمحت يوم كذا في طيارات لبورما قالنا بس لازم ترانزيت في بلد اسمها بانكوك واتقفلت!!

قولنا له طيب في طيارات رايحة على فين تانى في اليوم دة قالنا أها أنت ماتعرفوش رايحين فين طيب لحظة وجابلينا المدير وشاكوا فينا ماسبوناش إلا لما أقنعناهم أننا تابع منظمة خيرية وبنلف البلاد وطبعا رجعنا تاني للغربة واكتفينا بالطرق الصغرى لحد ما ربنا يقدرنا لحاجة كبيرة ، وطبعا نرجع ونقول الطرق دي في حالة الطفش فقط وبشرط المزح يكون مقبول من الغير..

وسلامتكم.

* أقرا أيضا عن هناء وشيرين في عشرينات:

هناء من هناك!

شيرين من هناك!