آآآآه يا بنطلوني!

اتصلت بي رفيقة دربي أنيسة مساء الثلاثاء البنفسجي.

أنيسة: "مش هتتجوزي بقى يا مصرية؟"

مصرية: "جواز إيه يا بنتي؟ المشكلة بقت أكبر من كده."

أنيسة: "مشكلة إيه بس؟"

مصرية: "مشكلة البنطلون.. نشوى طلعت قالت إنهم ’سحلوها و حاولوا خلع بنطلونها …

اللي ساعدها أنهم لم يفهموا أن السوستة على الجنب‘."

أنيسة: "يبقى من هنا ورايح كل سوستنا تبقى من الجنب .. كده أأمن برضه!"

مصرية: "المشكلة في البنطلونات اللي عندي، دي بالشيء الفلاني. معقولة أرميها عشان سوسَتها مش من الجنب. بس عندك حق يا أنيسة. فيه أولويات، بالذات بكرة."

أنيسة: "يعني محور القضية دلوقتي هو مكان السوستة."

ربما لمثل هذه الحوارات شعرت باللون البنفسجي يسيطر على يومي. في صغري أحببت البنفسج كما أحببت كل خلق جميل من خلق الله. و لكني اتُهِمت بحب الكآبة و الغموض لحبي لهذا اللون. هذا لأنهم قالوا أن الزهر يُفَضل أن يكون أحمر اللون، أما "التغيير" للون البنفسجي فهو أمر في منتهى الخطورة لشدة غموضه مما يشع الكآبة على النفوس.

وبالتالي، أصبحت "أخاف" أن "أعبر عن رأيي" في لون البنفسج لكي لا أُتهم بحب الغموض ونشر الكآبة ومحاولة "إرهاب" الآخرين. تدريجيا صدقتهم ثم صدقت نفسي وأصبح لون البنفسج يرتبط عندي بالتوتر والخوف من المجهول. ولهذا السبب "الوجيه" اتشح يوم الثلاثاء 31 مايو 2005 عندي بالبنفسجية.

فلم أكن مطمئنة تماما على حال بنطلوني في الغد. ذلك مثلي مثل كثير من المصريات. فإن مصير بنطلون كل مصرية أصبح مهددا‘ خاصة إذا لم تكن السوستة من الجنب! و إذا كان هذا هو حال البنطلون‘ فهذا إنما يدل على أن مبدأ الملبس في ذاته أصبح تحت التهديد!

هرعت إلى الهاتف واتصلت بفكرية لنفكر بشأن الغد...

مصرية: "هنعمل إيه بكرة يا فكرية؟"

فكرية: "لازم نلبس أسود طبعا يا مصرية. و هنروح. وربنا معانا."

مصرية: "عندك حق. بس برضه لازم نعمل احتياطنا."

فكرية: "أنا بأقول نلبس بنطلونات عشان نضمن الأمان."

مصرية: "تفتكري بعد اللي حصل يبقى البنطلون ’كفاية‘؟"

فكرية: .....

مصرية: "مالك؟"

فكرية (محاولة أن تغمز لي بعينها عبر الهاتف...): "خلي بالك من كلامك .. حد برضه يقول ’كفاية‘؟"

مصرية: "مش إنتي اللي بتقولي إن ربنا معانا؟"

فكرية: "بس معلش ... لازم نخلي بالنا من كلامنا برضه."

مصرية: " مش عايزين نشتت الموضوع... إحنا هنخلي بالنا من إيه ولا إيه .. أنا شايفة إننا نركز في موضوع البنطلون. فكري في بنطلونك و بس يا فكرية!"

فكرية: "طب هنلبس كام بنطلون؟"

مصرية: "أنا بأقول نلبس ثلاثة."

فكرية: "و فوقهم كام بلوزة كدة."

مصرية: "أنا شخصيا هألبس عبائتين كمان من فوق. كده أضمن."

فكرية: "تمام ... إتفقنا .. نتقابل بكره ... كله أسود في أسود."

اتجهت مع فكرية (تحت طبقات الملابس السوداء) إلى نقابة الصحفيين في صباح اليوم التالي، الأربعاء 1 يونيو 2005.

فكرية: "إنتي عارفة يا مصرية ... أنا بصراحة خايفة ... بس أنا هأروح عشان أكسر الخوف."

انشغلت عن حديثها بالنظر إلى وجوه العسكر المتراص أمام النقابة. و بالتعبير المرتسم على وجه العسكري المصري. عفوا، و لكن لماذا هذه النظرة في عينيه؟ و في عين الثاني و الثالث والرابع؟ لماذا هذه النظرة الجائعة؟ الجائعة لكل شئ و أي شئ!

أتذكر طفولتي في المدرسة البريطانية و كتاب القراءة الإنجليزي. كانوا يرسمون لنا رجلا طويلا عريضا بشنبات يرتدي بدلة زرقاء. و يعلموننا أننا أن هذا الرجل يجب أن يُحترم لأنه الإنجليش بوليسمان English Policeman (رجل الشرطة الإنجليزي). و كان الدرس يدور حول فكرة أن نسأل الإنجلش بوليسمان إذا ضللنا الطريق أو إذا تعرض لنا أحد بسوء.

لم أستطع أن أقاوم المقارنة بين هذه الصورة التي نبتتُ عليها و بين صورة المصري مافيشمان Mafishman. في الواقع لا أعرف السبب في ضآلة حجم العسكري المصري وهزاله. ولا أفقه لما تتركب تلك النظرة البلهاء عامة على وجهه إذا ضللت الطريق في المهندسين وسألته أين ميدان سفنكس فيشاور لي في اتجاه طريق الإسكندرية الصحراوي. وبالتأكيد لا أستوعب لما دائما هذه النظرة الجائعة إذا تبسمت في وجهه من باب الأدب أو الشفقة. لم أقابل مصرية لم تلحظ هذه النظرة ... و ذلك كان قبل الأربعاء الأسود ...

فقد كنا مازلنا نشعر أن الأمر عنده لا يتعدى أي أمل لما هو أكثر من هذه النظرة. و لكن من بعد الأربعاء الأسود أصبح الأمل أكثر واقعية ... و كان سؤالي لنفسى ... هل من ضمن تدريب العسكر أن تُجَّهَل عليهم الطرق و يُمنع عنهم الدخل السوي و أبسط الحقوق الإنسانية و ذلك كنوع من التجويع الأكبر من أجل الإعداد للمهمة الأكبر الخاصة بالبنطلون؟

وعدت فجأة لبنطلوني! "كفاية" كده! المهم بنطلوني. و تذكرت كلمات شيماء أبو الخير يوم هجوم المافيشمان: "دقائق و لم أعد أهتم بضرباتهم... كل همي أن أظل متشبثة ببنطلوني."

قلت في نفسي: "نعم." "اخترناك يا بنطلوننا اخترناك." "المهم بنطلونك يا مصرية. فكري في بنطلونك و بس."

لكن... تذكرت كلام زينة المقدسي: "ثمن السكوت غالي.. ثمن السكوت كرامتكم و عرضكم.. و الوطن!"

يا زينة يا جميلة يا مقدسية، شيلتي همي رغم إنك مش مصرية!

وقسمي بالخالق إنّي كمان شيلت همك.. سنين و سنين في قلبي أنين على قدسي و قدسك. لكن ... هما برضه قالوا أنكوا إنتوا اللي بعتم أرضكم. و حتى لو مظلومين، التفاهم أحسن من الإرهاب اللي بتعملوه... ده حتى زينة من زين. و زين مثل زيت. يعني ممكن تقلي أعداءك في الزيت! إيه الوحشية دي؟

"كفاية" بقى تفكير في زينة و فلسطين و العراق والمشاكل و البني آدمين. لابد من التركيز التام في المشكلة الجوهرية القائمة حاليا و هي مشكلة البنطلون. كفاية يا مصرية.. إياكي و التفكير في أي شئ غير بنطلونك. بنطلونك هو مستقبلك يا بنتي.

زمان كانوا يقولون للمصرية "مستقبلك هو بيتك و عريسك" و بعدين بقوا يقولوا لها "مستقبلك هو شهادتك". لكن أنا دلوقتي بأقولها وبكل وضوح... "مستقبلك هو بنطلونك يا مصرية."

آه يا زينة المقدس يا مين يقدرني أشيل ما شيلتي... يا مين يقدرني أقولك "كفاية" عليكي وعلى أبوك وأخوك وابن عمك سنين... سنين رجالتكوا واقفة تحمي أرض الإسراء و قبة الصخرة بالروح والجسد الطاهرين. منين أجيب كلام مثل كلامك الجميل. كلام خطتيه بحبر الأنين و صَدَقتي لما قلتي:

"آه يا وجع يا ألم يا نهر دمع حزين

يا عسكر السلطة صوتي أمل مش أنين

عارفين طريقنا و عارفين راح نروح على فين

ومصر زهرة ثمنها غالي مش كلمة أو كلمتين

لازم حندفع و يوم الفرج فاضل عليه خطوتين."

أنا ماقدرش يا زينة أتَوَجَع زيك و لا أقدر أقول لا "كفاية" و لا زيادة ... أنا كل اللي أقدر أقوله: "آآآآآآآآآه يا بنطلوني!"

وإنّا لله وإنّا إليه راجعون.

بنت النيل: مصرية

* مشاركة أرسلتها لنا داليا، وننتظر مشاركاتكم على contact20at@yahoo.com