نادية في الأدغال

سافرت كثير وقليل، من وأنا صغيرة رحت أمريكا الشمالية، رحت أوروبا، رحت حتى اليابان، بس ما شفتش ولا حصلي اللي حصل في أفريقيا.

عارفين إزاي بنبحلق في الأفارقة لما بيجولنا مصر..؟أهوه أنا بقه بيبحلقولي كده هنا في السنغال.

عاملة بالنسبة لهم زي الحاجة العجيبة. يمكن مش بس عشان بيضاء اللون،يمكن كمان حجابي اللي مستغربينه.

يسألوني أيه الجماعة كل شوية في الشارع..؟ أنت مسلمة؟ لاااا يا راجل ؟ يعني لابسة حجاب سفلقة يا جدع؟ وبعدين يعملولي اختبار..والله..حصلت لي أكثر من مرة..!

اختبار إسلام..شكلي كده بفشل فيه...قال إيه..أقولهم مسلمة فيمدوا لي إيدهم عشان يصافحوني..!

أنا الصراحة كده من ساعة ما "كبرت في السن" بأصافح لو حد مد لي ايده..!! المهم...يمدوا إيدهم أمد إيدي وأصافح..يقولوا أهاه! أنت بتسلمي! احنا عندنا في السنغال الست اللي لابسة حجاب لا تسلم على الرجال! يادي الكسفة السوداء!

المهم..وصلت البلد دي ييجي الساعة 11 بالليل، بعد رحلة دامت أكثر من 17 ساعة. نعم 17 ساعة. عشان آجي السنغال في أقصى غرب القارة الأفريقية، لازم الأول أعدي على أوروبا فوق في الشمال، وبعدين أنزل الجنوب ثاني..!!

المهم..تعبانة ومرهقة وما صدقت أدخل السرير ييجي الساعة 1 الصبح كده. قوم أيه؟ كل ما أقلق في نومي ألاقيهم بيؤذنوا لصلاة الفجر! والله قلت في نفسي تلاقيك بتحلمي يا بنت يا نادية من التعب..!!

أنا كنت عارفة أن الفجر الساعة 6 وشوية. بس لما سمعت الآذان أول مرة وبصيت في الساعة لقيتها 5. أكيد بأحلم. نمت. شوية كده، أصحى ثاني على الآذان، ألاقيها 5 وثلث. ركزت بقه. قلت لأ. تلاقي توقيت صلاة الفجر اللي معايا في الورقة هو اللي غلط. قومي صلي الفجر يا بنت بدل ما يفوتك. قمت صليت. على بال ما توضأت وصليت ودخلت السرير ثاني على 6، ألاقيهم بيؤذنوا ثالث! كنت حأتجنن! صليت مرة ثانية لأحسن قلقت الصراحة.

المهم...الصبح وانا راكبة العربية عشان أروح من الفندق اللي أنا فيه للفندق اللي فيه ورشة العمل اللي جاية عشان أحضرها، قلت أسأل السواق. أشوف كده احتمال أقراص الملاريا اللي بآخدها عاملالي هلوسة زي الورقة بتاعتها ما بتقول، ولا فعلا الجماعة هنا بيؤذنوا للفجر 3 مرات. تخيلوا ما كنتش بأهلوس؟ الشعب السنغالي من كثر كسله..وده شيء أنا ملاحظاه عندهم من ساعة ما رحت سفارتهم في مصر ولقيتهم مش بيبدأوا يروحوا الشغل إلا الساعة 11 الصبح..من كثر كسلهم المؤذنين بيصحوهم مرتين قبل الفجر ومرة على الفجر عشان يضمنوا أنهم قاموا فعلا..!!

كفاية كدة عليكم النهاردة ..بس عندي حكايات تانية كتير ..أكتبهالكم بعدين ..أنا قايمة أصلي العصر التامن ..ربنا مايقطعلهم عادة